جيت لك يا صاحبي
بعد فرقة وطول مغيب
جيت لك تداوي جرح قلبي
أو تِطّفي لي اللهيب
كلي احساس شوق ولهفة
حضنك الدافي امان
يترمي فيه الغريب
جيت لك يا صاحبي
لجل ما ارمي فيك همومي
و أحضنك تروي جوايا الآمان
وف وريدي ارسمك
عايز اقولك
كل احزان الضلوع
عايز اقول لك
بس اخاف تلسعني
دمعة م الدموع
ويضيع مع العتمة الطريق
وانسى الرجوع.!
جيت لك يا صاحبي مشتاقلك
رغم قربك من عيوني
مشتاقلك اشكيلك
همي واحزاني وجنوني
و أوعى يا دمعة تخوني
وانا جاي اجري
ارمي حلمي فيك وهمي
اترمي جواك واصرخ
باشتياق لهفة حبيب...
و أنت ف اللحظة دي أمي
راح تاخدني بين كفوفك
راح تسمي
وتداويني ..
ما انت صاحبي والطبيب
راح تعاند فيا احزاني وهمي
جيت يا صاحبي
ليه باحس انك قُريب رغم بُعدك
غصب عني
ليه باحس اني باطولك
رغم انك مش سامعني
ليه باخاف لحظة غموضك
رغم انك حته مني
ليه باعيش جواك قصيدة
حتي موجك جوه سامعني
راح يغني …
جيت يا صاحبي
لجل ما تلملم ضلوعي
لجل ما تنشف دموعي
لجل ما تروي فروعي
وترد لي عقلي
اللي تاه ف السكة مني
جيت لك يا صاحبي
